Prabhas: యంగ్ రెబ‌ల్ స్టార్ ప్రభాస్ గురించి ప్ర‌త్యేక ప‌రిచ‌యాలు అక్క‌ర్లేదు. ఆయ‌న సినిమాల కోసం అభిమానులు క‌ళ్ల‌ల్లో ఒత్తులు వేసుకొని మ‌రీ ఎదురు చూస్తున్నారు. త్వ‌ర‌లో ప్రభాస్ న‌టించిన ఆదిపురుష్ చిత్రం ప్రేక్ష‌కుల ముందుకు రానుండ‌గా, చాలా కాలంగా ఈ సినిమా ట్రైలర్ కోసం ఆస‌క్తిగా ఎదురు చూస్తున్నారు. టీజర్ తో నిరాశపరిచిన టీమ్.. ట్రైలర్ తో అయినా అందరిని మెప్పించాల‌ని అనుకుంటుంది. ఈ క్ర‌మంలో ఆదిపురుష్ ట్రైల‌ర్‌కి టైం ఫిక్స్ చేసింది. మే 9న గ్లోబల్ ట్రైలర్ లాంచ్‌తో హిస్టరీ క్రియేట్ చేయడానికి స‌న్నాహాలు చేసుకుంటుంది ఆదిపురుష్ టీమ్.
తాజాగా మెగా ట్రైలర్ లాంచ్‌ను ప్రకటిస్తూ.. ఆదిపురుష్ నుంచి పాన్ ఇండియా స్టార్, ప్రభాస్ కొత్త పోస్టర్‌ను విడుద‌ల చేసింది చిత్ర బృందం. ఈ ట్రైల‌ర్‌ని మన దేశంలోనే కాకుండా ప్రపంచవ్యాప్తంగా 70 దేశాలలో ఈ ట్రైలర్ ను రికార్డ్ స్థాయిలో లాంచ్ చేయబోతున్నట్టు వినికిడి. ఇప్పటికే న్యూయార్క్‌లోని ట్రిబెకా ఫెస్టివల్‌లో అంతర్జాతీయ ప్రీమియర్‌కు సెలెక్ట్ కావడం ద్వారా ఓ గొప్ప మైల్ స్టోన్ ను ఆదిపురుష్ సాధించిన‌ట్టైంది. భారీ అంచనాల‌తో వ‌స్తున్న ట్రైలర్ కోసం ప్రపంచవ్యాప్తంగా ఉన్న ప్రేక్షకులంద‌రు ఎంతో ఆస‌క్తిగా ఎదురు చూస్తున్నారు.