kerala : తల్లిదండ్రులు తమ పిల్లలతో కలిసి 10వ తరగతి పరీక్షలు రాసి ఉత్తీర్ణులైన సంఘటనలు ఎన్నో చూశాం. కానీ, తల్లీకొడుకులు ఒకేసారి ప్రభుత్వ ఉద్యోగానికి ఎంపికయ్యారు. నాలుగో సారి వారు విజయం సాధించిన ఘటన కేరళ లో జరిగింది. కేరళకు చెందిన బిందు తన 10వ తరగతి చదువుతున్న కొడుకు చదువుపై మరింత శ్రద్ధ పెట్టేందుకు పుస్తకాలు చదవడం ప్రారంభించింది. చివరికి, ఆమె తన చదువుపై మరింత ఆసక్తిని కనబరిచింది మరియు కేరళ పబ్లిక్ సర్వీస్ కమిషన్ (PSC) పరీక్షలకు హాజరు కావడానికి శిక్షణను ప్రారంభించింది. ఇద్దరూ కలిసి మూడుసార్లు పోటీ పరీక్షలకు హాజరైనా నిరాశ చెందక మరోసారి ప్రయత్నం చేయగా తల్లీకొడుకులు లక్ష్యాన్ని సాధించారు.
గత పదేళ్లుగా అంగన్‌వాడీ వర్కర్‌గా పనిచేస్తున్న 42 ఏళ్ల బిందు లాస్ట్ గ్రేడ్ సర్వెంట్స్ (ఎల్‌జీఎస్) పోస్టుకు నిర్వహించిన పోటీ పరీక్షలో 92వ ర్యాంక్ సాధించగా, తన 24 ఏళ్ల కుమారుడు లోవర్‌ డివిజనల్‌ క్లర్క్‌ (ఎల్‌డీసీ) పోస్ట్ కోసం నిర్వహించిన పరీక్షలో 38వ ర్యాంక్ సాధించాడు. దీంతో ఆ కుటుంబం ఆనందానికి అవధుల్లేవు. కొడుకును ప్రోత్సహించేందుకు 10వ తరగతి చదువుతున్నప్పుడే చదవడం ప్రారంభించానని బిందు తెలిపింది. ఆ తర్వాత పోటీ పరీక్షల కోసం కోచింగ్ సెంటర్‌లో చేరానని చెప్పింది.
డిగ్రీ పూర్తయిన తర్వాత తన కొడుకును కూడా అదే కోచింగ్ సెంటర్‌లో చేర్పించినట్లు వివరించారు. వీరిద్దరూ ఇప్పటికి మూడుసార్లు ప్రయత్నించి ఎట్టకేలకు నాలుగో ప్రయత్నంలో విజయం సాధించినట్లు వెల్లడించారు. ఐసీడీఎస్ సూపర్‌వైజర్ కావడమే తన లక్ష్యమని ఈ సందర్భంగా ఆమె స్పష్టం చేశారు. పోటీ పరీక్షలకు ప్రిపేర్ అవుతున్న సమయంలో తన స్నేహితులు, కోచింగ్ సెంటర్ ఫ్యాకల్టీ, తన కొడుకు ప్రోత్సహించారని తెలిపారు.
బిందు కొడుకు తన తల్లితో కలిసి చదువుతున్నప్పుడు వివిధ అంశాలపై చర్చించుకునేవారని చెప్పారు. ‘నేను ఒంటరిగా చదువుకోవాలని అనుకునేవాడిని.. మా అమ్మ ఎక్కువ కాలం చదువుకోలేదు.. అంగన్‌వాడీ పని అయిపోయిన తర్వాతే చదువుకునేది’ అని వెల్లడించారు. గతంలో పోలీస్ ఉద్యోగం పోగొట్టుకున్నానని, సప్లిమెంటరీ లిస్టులో నా పేరు ఉందని చెప్పాడు. ఇప్పుడున్న ఉద్యోగానికి ఆరు నెలల ముందే ప్రిపరేషన్ ప్రారంభించానని, మూడేళ్ల తర్వాత వచ్చే పరీక్షల ప్రకటన వచ్చే వరకు విరామం తీసుకుంటానని చెప్పాడు.